இரண்டாவது உலகம் - THE KEPLER 452b

Image: PICRYL 

மனிதனின் பார்வையில் பிரபஞ்சம் என்பது அழகிற்கும் அமைதிக்குமான ஒரு இருப்பிடமாகவே தெரிகிறது. இவற்றுடன் பல அதிசயங்களையும் ஆச்சரியங்களையும் கூட தன்னுள்ளே அடக்கியுள்ளது.

நமது சூரியக் குடும்பத்தில் ஒன்பது கிரகங்கள் உள்ளன. இது நமக்குத் தெரிந்ததே. சூரியனைப் போலவே 40 ஆயிரம் கோடி நட்சத்திரங்கள் இந்தப் பால்வெளி அண்டத்தில் உள்ளன! அந்த நட்சத்திரங்களைச் சுற்றிலும் பல கிரகங்கள் வலம் வந்துகொண்டு தான் இருக்கின்றன. இந்த பிரபஞ்சத்தில் தற்போது வரையில், நமது பால்வெளி அண்டதைப் போலவே பத்தாயிரம் கோடிக்கும் மேலான விண்மீன் மண்டலங்கள் இருப்பதாகக் கூறப்படுகிறது! எனவே, இவ்வளவு பெரிய ஒரு அமைப்பில், நாம் மட்டும் தனியாக இல்லை என்று பல விஞ்ஞானிகள் கருதினர். 

எனவே 2009ஆம் ஆண்டு, மார்ச் மாதம் 7 ஆம் நாளில் கெப்லர்  (KEPLER) எனும் பெயர் கொண்ட தொலைநோக்கியானது விண்வெளிக்கு அனுப்பப்பட்டது. ஜெர்மனியைச் சேர்ந்த வானியலாளரான Johannes Kepler என்பவரின் நினைவாகவே இந்தத் தொலைநோக்கிக்கு, 'கெப்லர்' என்று பெயரிடப்பட்டது. இந்தப் பிரபஞ்சத்தில், பூமியைப் போன்று இருக்கக்கூடிய பல்வேறு கிரகங்களைக் கண்டுபிடிப்பதே இதன் நோக்கமாகும். இந்தத் தொலைநோக்கியானது இதுவரை, ஆயிரத்திற்கும் மேற்பட்ட கிரகங்களைக் கண்டுபிடித்துள்ளது. அவற்றில், 2 முதல் 12 கிரகங்கள், பூமியைப் போலவே வாழத் தகுதி உள்ள கிரகங்களாக இருக்கலாம் என்று கூறப்படுகிறது. அவற்றில் ஒன்றுதான்  கெப்லர் 452b எனும் கிரகமாகும். நாசா விஞ்ஞானிகள் இதனை இரண்டாம் உலகம் என்றே அழைத்தனர்.

கெப்லர் 452b கிரகத்தின் சூரியன்: 

Image: PinkPik

இந்தக் கிரகத்தின் சூரியனானது கெப்லர் 452 என்று பெயரிடப்பட்டுள்ளது. இது, பூமியிலிருந்து 1400 ஒளி ஆண்டுகள் தொலைவில் அமைந்துள்ளது! இதன் நிறையானது கிட்டத்தட்ட, நமது சூரியனின் நிறைக்குச் சமமாகவே உள்ளது. இதன் விட்டம் நமது சூரியனை விட 11% மட்டுமே அதிகமாகும். மேலும், இந்த நட்சத்திரமானது நமது சூரியனை விட 20 % அதிகமான ஒளியை உமிழ்கிறது. இந்த நட்சத்திரம், நமது சூரியனைப் போலவே ஒரு மஞ்சள் குறுநட்சத்திரம் (Yellow Dwarf star) ஆகும். ஆனால், இந்த நட்சத்திரத்தின் வயதானது சூரியனை விட 140 கோடி ஆண்டுகள் அதிகமாகும்! சூரியனின் வயது 460 கோடி ஆண்டுகள். இந்த நட்சத்திரத்தின் வயது  600 கோடி ஆண்டுகள் ஆகும். இன்னும் சில நூறு கோடி வருடங்களில் இந்த நட்சத்திரம் முழுவதுமாக அழிந்து விடும் என்று கூறப்படுகிறது! 

இந்த நட்சத்திரத்தின் மேற்பரப்பு வெப்பநிலையானது 5700 கெல்வின் என்ற அளவில் உள்ளது. சூரியனின் மேற்பரப்பு வெப்பநிலையும் கிட்டத்தட்ட இதுவே. எப்படி இந்த நட்சத்திரமானது நமது சூரியனின் பல பண்புகளுடன் ஒத்துப் போகிறதோ, அதுபோலவே இந்த நட்சத்திரத்தின் கிரகமும் நமது பூமியுடன் பல பண்புகளில் ஒத்துப்போகிறது. இப்பொழுது, இந்த நட்சத்திரத்தைச் சுற்றி வரக்கூடிய  கெப்லர் 452b எனும் கிரகத்தைப் பற்றி விரிவாகக் காண்போம். 

கெப்லர் 452b - பூமியின் நகல்:

நமது பூமிக்கும் சூரியனுக்கும் இடையே இருக்கும் தூரமான 14,95,97,877 கிலோமீட்டர் தூரமானது  1AU (1 astronomical unit) என்று குறிப்பிடப்படுகிறது. இதுபோலவே  இந்த கெப்லர் 452b கிரகத்திற்கும் அதன் சூரியனுக்கும் இடையே இருக்கக்கூடிய தூரம் 1.046AU ஆகும். கிட்டத்தட்ட நமது பூமிக்கும் சூரியனுக்கும் இடையே இருக்கக்கூடிய தூரத்திற்குச் சமமாகவே இது உள்ளது!

அடிப்படைப் பண்புகள் :

பூமியின் விட்டமானது 12,000 கிலோமீட்டர் ஆகும். இந்த கெப்லர் 452b கிரகத்தினுடைய விட்டம் 20000 கிலோ மீட்டர் ஆகும். அதாவது, இந்தக் கிரகம் பூமியை விட 60% பெரியது! மேலும் இந்த கிரகத்தின் ஈர்ப்பு விசையானது பூமியை விட இரண்டு மடங்கு அதிகமாக உள்ளது. இந்த கிரகத்தின் மேற்பரப்பில் நீங்கள் நடந்தால், உங்கள் தோளில் உங்கள் எடையுள்ள மற்றொரு மனிதரை, தூக்கிக் கொண்டு நடப்பது போல் இருக்கும்!

Image: wikimedia commons

இந்த கிரகத்தில் ஒரு வருடம் என்பது 385 நாட்கள் ஆகும். மேலும் இது, பூமியைப் போலவே தன்னைத்தானே சுற்றிக் கொண்டு அதன் சூரியனையும் சுற்றி வருகிறது! இதனால் சூரியனின் வெப்பமானது இந்த கிரகத்தின் அனைத்துப் பகுதிகளுக்கும் சமமான அளவில், கிடைக்கிறது. மேலும் இந்த கிரகமானது, ஒரு நீள் வட்டப்பாதையில் தனது சூரியனைச் சுற்றி வருவதால் இந்த கிரகத்திலும், பூமியைப் போலவே கால நிலை மாற்றங்கள் ஏற்படுகின்றன!

கெப்லர் 452b உயிர்கள் வாழத் தகுந்த கிரகமா?

ஒரு கிரகமானது அதனுடைய நட்சத்திரத்திற்கு மிக அருகிலிருந்தால் அந்தக் கிரகம் மிகவும் வெப்பமாகவும், தொலைவிலிருந்தால்,  மிகவும் குளிராகவும் இருக்கும். இவை இரண்டிற்கும் இடையில் சரியான வெப்ப நிலையில் ஒரு கிரகம் அமைந்திருந்தால் மட்டுமே, அங்கு நீரானது திரவ வடிவத்தில் இருக்கும். இந்தப் பகுதி "the habitable zone" என்று அழைக்கப்படுகிறது.

கெப்லர் 452b கிரகமும் உயிர்கள் வாழத் தகுந்த  habitable zone எனும் பகுதியில் தான் உள்ளது. எனவே இந்த கிரகத்தில் நீரானது திரவ நிலையில் உள்ளது. கெப்லர்  தொலைநோக்கியால் கண்டுபிடிக்கப்பட்டு the habitable zone எனும் பகுதியில் இருக்கக்கூடிய கிரகங்கள் கீழே கொடுக்கப்பட்டுள்ளன.

Image: PICRYL

மேலும் இந்த கிரகத்தில் பாறைகள் அதிக அளவில் இருப்பது கண்டுபிடிக்கப்பட்டுள்ளது. இந்த கிரகத்தின் வெப்பநிலையானது பூமியின் சராசரி வெப்பநிலையை விட 10% அதிகமாகும். ஆனால், தமிழ்நாட்டில் சென்னையிலும், திருச்சியிலும் 100°C வெப்பத்தில் வாழும் மக்களுக்கு இது ஒன்றும் அவ்வளவு பெரிய வெப்பமாக இருக்காது.  

வளிமண்டலம்:

ஒரு கிரகத்தில் உயிர்கள் வாழ வேண்டும் என்றால் அந்த கிரகத்திற்குக் கண்டிப்பாக, குறிப்பிட்ட அளவு வளிமண்டலம் இருக்க வேண்டும். பூமியில் உள்ள வளிமண்டலத்தை ஓசோன் படலம் பாதுகாக்கிறது. மேலும் இந்த வளிமண்டலத்தைப் பாதுகாப்பதில் பூமியினுடைய காந்தப்புலமும் பெரிய அளவில் பங்கு வகிக்கிறது. 

ஆனால் இந்த "கெப்லர் 452b" கிரகத்தில் வளிமண்டலம் இருக்கிறதா இல்லையா என்று இதுவரை உறுதியாகத் தெரியவில்லை. ஏனென்றால் இந்த கிரகத்தினுடைய சூரியனிலிருந்து அதிகப்படியான சூரிய நடுக்கங்கள் (solar flares)  இந்த கிரகத்தைத் தாக்குகின்றன. இவை அந்த கிரகத்தின்  வளிமண்டலத்தை, பாதிக்க வாய்ப்புள்ளது. இருப்பினும், இந்த கிரகமானது பூமியினுடைய காந்தப்புலத்தைப் போல இரண்டு மடங்கு அதிகமான காந்தப்புலத்தைக் கொண்டுள்ளதால், தனது வளிமண்டலத்தைத் தக்க வைத்துக் கொண்டிருக்கவும்  வாய்ப்புள்ளது.

இந்த கிரகத்தில், எவ்வளவு நீர் உள்ளது என்று இதுவரை உறுதி செய்யப்படவில்லை. ஏனென்றால் இந்த கிரகத்தினுடைய நட்சத்திரம், சூரியனை விட, சற்று அதிகப்படியான வெப்பத்தினை உமிழ்வதால், இந்த கிரகத்தில் உள்ள நீர் அதிக அளவில் வற்றிப் போகவும் வாய்ப்புள்ளது. நமது பூமியின் வளிமண்டலத்தில் 78% நைட்ரஜன் வாயுவால் நிறைந்துள்ளது. இதுபோல்,  கெப்ளர் 452b கிரகத்தின் உடைய வளிமண்டலம் பற்றி இதுவரையில் எந்த தகவலும் கிடைக்கவில்லை. 

இருப்பினும் பூமியின் பல பண்புகள் இந்த கிரகத்துடன் ஒத்துப்போவதால், இது இரண்டாம் உலகம் என்று அழைக்கப்படுகிறது. பண்புகளின் அடிப்படையில் இதனை பூமியின் நகல் என்றும் கூறலாம். 

தொலைவு:

இந்தக் கிரகம் பூமியிலிருந்து சுமார் 1400 ஒளி ஆண்டுகள் தொலைவில் உள்ளது. ஒளியில் வேகத்தில் நீங்கள் சென்றால் கூட அந்த கிரகத்தை அடைவதற்கு 1400 வருடங்கள் ஆகிவிடும்! மீண்டும் பூமியை அடைவதற்கு மற்றொரு 1400 வருடங்கள் ஆகிவிடும். எனவே, இந்த கிரகத்திற்குச் சென்று வருவதற்கு மொத்தமாக நீங்கள் 2800 பயணித்திருக்க வேண்டும்! 

ஆனால் இது நடைமுறையில் சாத்தியம் இல்லை. இருப்பினும், அறிவியல் எனும் பலமான ஆயுதம் நம்மிடம் இருக்கும் வரையில், எதையும் அவ்வளவு எளிதில், முடியாது என்று சொல்லிவிட முடியாது! 

பூமி, இன்னும் சில பில்லியன் வருடங்களில் தானாகவே அழிந்து விடும். ஆனால் இப்போது இருக்கக்கூடிய சுற்றுச்சூழல் மாசுபாடுகளைப் பார்க்கும் பொழுது, இன்னும் சில ஆயிரம் வருடங்களிலேயே பூமி, வாழ்வதற்குத் தகுதியற்ற கிரகமாக மாறிவிடும் என்றுதான் தோன்றுகிறது. எனவேதான் மனித இனத்தை மற்றொரு கிரகத்தில் குடியேற்றுவதற்காக மனிதர்கள் திட்டமிட்டுக் கொண்டிருக்கிறார்கள். 

ஒருவேளை......

அந்த கிரகத்தில் உயிரினங்கள் இருந்து, அவர்களும் நம்மைப் போல் தங்களது கிரகத்தை மாசுபடுத்திவிட்டு பூமியை நாடி வந்தால் அவர்களுக்கும் ஏமாற்றமே மிஞ்சும்.